2010, ഓഗസ്റ്റ് 6, വെള്ളിയാഴ്‌ച

കൗച്ച്ഡിബിയും, beam.smpയും പിന്നെ സ്പീഡും

ഉബുണ്ടു ഇൻസ്റ്റോൾ ചെയ്ത് അധികം വൈകാതെ തന്നെ ഇടയ്ക്കിടയ്ക്ക് സിസ്റ്റം വല്ലാതെ ഹാങ് ആയിക്കൊണ്ടിരുന്നു. കാരണമെന്താണെന്നൊട്ടറിയത്തുമില്ല. എന്താണ് പ്രശ്നം എന്നറിയാനുള്ള ശ്രമങ്ങളൊക്കെ beam.smp എന്നൊരു പ്രോസസ്സിലാണ് ചെന്നു നിന്നത് (സിസ്റ്റം > അഡ്മിനിസ്ട്രേഷൻ > സിസ്റ്റം മോണിട്ടറിൽ , പ്രോസസ്സ് എന്ന റ്റാബിൽ പ്രവർത്തിക്കുന്ന എല്ലാ പ്രോസസ്സുകളും കാണാം). സ്ഥിരമായി നല്ലൊരു ശതമാനം റിസോഴ്സ് കൈക്കലാക്കിയിരുന്ന ആ പ്രോസസ്സ്, ഇടയ്ക്കിടെ വല്ലാണ്ട് വലുതാകുകയും സിസ്റ്റം വലിയുകയുമാണ് ചെയ്തുകൊണ്ടിരുന്നത്. ഈ beam.smp എന്താണ് ചെയ്യുന്നതെന്നറിയാൻ ഒന്നു രണ്ട് പ്രാവശ്യം ഗൂഗിളാനെ സമീപിച്ചെങ്കിലും അതും വലിയ ഫലം തന്നില്ല, കൗച്ച്ഡിബിയുടെ (http://couchdb.apache.org/) ഭാഗമാണെന്ന് മാത്രം മനസ്സിലായി, എന്റെ വിവരക്കുറവുകൊണ്ട് കൗച്ച് ഡിബിയെന്താണ് എന്റെ കമ്പ്യൂട്ടറിൽ ചെയ്യുന്നതെന്നും മനസ്സിലായില്ല. ഈ beam.smp മാത്രമായി ഒഴിവാക്കാനൊരു മാർഗ്ഗം കാണാഞ്ഞതിനാൽ ഒടുവിൽ വളരെ ആലോചിച്ച ശേഷം കൗച്ച്ഡിബി തന്നെ ഒഴിവാക്കാം എന്നൊരു സാധാരണ തീരുമാനമെടുത്തു. സത്യം പറഞ്ഞാൽ beam.smp പ്രശ്നത്തിൽ കൗച്ച്ഡിബി ഒഴിവാക്കാൻ നിർദ്ദേശിക്കുന്ന ചില സൈറ്റുകളും കണ്ടാരുന്നു.

കൗച്ച്ഡിബി ഒന്നിലധികം ആപ്ലിക്കേഷനുകൾ ഉപയോഗിക്കുന്നു കണ്ടതുകാരണം പർജ് ചെയ്തു കളഞ്ഞു

കൗച്ച്ഡിബി എടുത്തുകളയാൻ ടെർമിനലിൽ (ആപ്ലിക്കേഷൻ > ആക്സസറീസ് > ടെർമിനൽ)

  sudo apt-get --purge remove couchdb*

എന്നു കൊടുക്കുക.
അക്കൂടെ ഞാൻ ഒട്ടും ഉപയോഗിക്കാത്ത gwibber തുടങ്ങിയ കുറേ സാധനങ്ങളും അങ്ങുപോയി, എന്നാലും സമാധാനമുണ്ട് മെഷീനിപ്പോൾ പണ്ടത്തേക്കാളും വേഗതയുണ്ട്.

ഇവലൂഷൻ മെയിൽ ക്ലയന്റ് ഉപയോഗിക്കുന്നില്ലെങ്കിൽ [ഞാൻ തണ്ടർബേഡാണ് ഉപയോഗിക്കുന്നത് ;-) ], അതും ഇതുപോലെ പർജ് ചെയ്ത് നീക്കുന്നതാണ് നല്ലതെന്നെന്റെ അഭിപ്രായം. ഇവലൂഷനും കൈമണികളും കൂടെ ഒരുപാട് റിസോഴ്സ് തിന്ന് തീർക്കുന്നുണ്ട്.

മാർഗ്ഗം:

   sudo apt-get --purge remove evolution*

നല്ലുബുണ്ടു നേരുന്നു.

പുതിയ വാർത്ത: ഇതുമായി ബന്ധപ്പെട്ട ഒരു ബസ് ഇവിടെ ഓടുന്നുണ്ട്. അവിടെ കൗച്ച്ഡിബി എല്ലാ ഉബുണ്ടു ഇൻസ്റ്റലേഷനിലും ഇല്ല എന്നാണ് കേൾക്കുന്നത്. ഇവലൂഷനും അനുബന്ധ പാക്കേജുകളും എടുത്തു കളയുമ്പോൾ സൂക്ഷിക്കണം, അനുബന്ധ പാക്കേജുകളിൽ ചിലവ ഉപയോഗമുള്ള മറ്റ് ആപ്ലിക്കേഷനുകളും ഉപയോഗിക്കുന്നുണ്ട് എന്നും കേൾക്കുന്നു ;-)

1 അഭിപ്രായം:

  1. sudo apt-get --purge remove couchdb*

    sudo apt-get --purge remove evolution*

    ഇതിന്റെ കൂടെ എന്തൊക്കെയോ പോയി!
    അതിനു ശേഷം ഗ്രാഫിക്സ് ലോഡ് ചെയ്തില്ല!ഇത് രണ്ടും തിരിച്ച് ഇൻസ്റ്റാൾ ചെയ്തിട്ടും ശരിയായില്ല. ഉണ്ടായിരുന്ന ബാക്കപ്പ് ഫയൽ കറപ്റ്റഡ് ആയിരുന്നു. മേജർ പണി കിട്ടി!
    എന്തു ചെയ്തൂന്നല്ലേ? റി ഇൻസ്റ്റാൾ :)

    മറുപടിഇല്ലാതാക്കൂ